Texte

Si louft dür d Strasse z Bern – in Richtig Lorrainebrügg
si dänkt zrügg a die Zit wo mir üs gseit hei, mir hei üs gern [ig ha di gärn]
si hetsech müesse entscheide: entweder d Nadle oder ig
si hetsech für d Droge entschide – und derbi ischs blibe

Und si geit dert uf d Lorrainebrügg, und si stigt uf das Mürli ufe,
d Lüt am Strasserand si rüefe HALT chum doch zrugg,
doch si chasech nümme häbe…

Die graue Wulche über ihre – si zieh jetzt uf,
ihrem scheiss Dealer het si gloubt, wo är gseit het: He Baby da chunnsch locker drus
Am Schluss isch si sowit gsi – si het ihre Körper müesse verkaufe,
und es isch viu z spät gsi, dass si no einisch het chönne dervo loufe….

Und si geit dert uf d Lorrainebrügg, und si stigt uf das Mürli ufe,
si meint es göngere soviu besser dert änet dr Brügg,
u si chasech nümme häbe…

Und si geit dert uf d Lorrainebrügg

Text & Musik: Simon Loosli, 2007

Si isch es eifachs, hübsches Meitschi gsy,
wos nid eifach het gha,
i dr Schuel hetme si gäng ghänslet
und ou ihri Schwöschter isch drunger cho.

Scho früeh het sie glehrt lüge,
das isch daheime nötig gsy,
dr Pere isch e feige Siech u d Mere e bösi Häx
richtigi Liebi berchunnt sie nid.

U wo dr Fründ vo dr Muetter si de aglängt het
u ihre d Seeu ewäg het gnoh
isch öpis töif i ihre passiert
u sie isch nümme zuäsäch cho

«
U jedi Nacht bsuecht mi dr Tüfu
u nimmt mi fescht i Arm
är seit zu mir, – i sig sis Meitschi
u git mir no chli warm
Verlangt vor mir viu Mönscheseele
so das mi Fluech zerbricht,
doch äs weis jedä das mini Muetter
nid het was si verspricht
»

Si isch di bösi Häx vo Bäup
si isch nid immer e bösi gsy,
verfluecht vo daheim u vo dr Gsellschaft,
äs guets Ändi nimmt das nid für sie

Di bösi Häx vo Bäup,
ou ig hane Begägnig gha,
das het mir denn fasch z Läbe kostet
u niemer hinderet si dra
Di bösi Häx, Häx, Häx
Häx – di bösi Häx, Häx, … HÄX

Si isch gflüchtet und het e Ma gnoh,
dä het ihre aues gäh,
äs Chind, äs Daheim und sini Liebi,
doch sie isch ab u het ds Chind mitgnoh

Si isch wider i das Dorf zrugg
wo aus si Afang het gnoh,
dert het ihri bösi Muetter gwartet
u dr Tüfu natürli o

Statt ihri Chance z packe
isch aues angers cho
ds Chind steit ufm Abstellgleis,- sie spilt am Tüfu si Huer
und über Liichä, da geit si o!

«
U jedi Nacht, nach däm dr Tüfu
furt isch us mim Bett,
da füehli mi so dräckig
u merke was mis Mami mir gnoh het
Ha mini grossi Liebi verlore
u mim Chind dr Papi wäg gnoh
und au die Lüt um mi umä
si gloube am Tüfu, eifach so
»

Text & Musik: Simon Loosli, 2021/2025

Ar hocket widermau allei a däm holzige Tisch
und är fragt sich, was i sim Läbe schief gloffe isch
scho wider isches z dritte Bier – und är weis äs söu nid si
är het doch numme chli weue vergässe – und glücklich si derbi

Dä chli Ma, är het e mau, e ganz ä grosse Troum gha
einisch aus Clown verchleidet, – ire Zirkusmanege stah
d Lüt aui zum Lache bringe, seu sini Ufgab si
doch wöu är säuber nie het glert lache, – ischs e Troum blibe für ihn

Gib nid uf chline Clown [yeiyeah]
gib nid uf chline Clown [mmmmmh]
gib nid uf chline Clown [yeiyeah]
gib nid uf chline Clown [mmmmmh]

Die auti Chischte ufm Dachbode, dertdrin bergrabe ligt si Troum
Perüke, Schminkzüg u Chleider, – haut z Werkzüg vomene Clown.
Är schiebt sis Bier ufd Site, – weu ufzmau packtne dr Muet
är nimmt die auti Chischte füre, – es duet sire Seel so guet

Mit sine wunderbare Farbe bemahlt är sis aute Gsicht
är luegt sich grad im Spiegel a, – wo är i Tränne usbricht
und uf einisch, – da wird ihm klar, wie eifach dases wäri gsi
sini Angscht vorem Lache z überwinde, – u sini Gränze spränge derbi

Siner Tränne, – si loufe ihm, – Backe zdürab
und si verwüsche däm aute Clown sis Gschicht
ds Resultat dervo, äs gseht so lustig us, – dass jedä Stei zerbricht
und eso het är glert lache und änderet sini Gschicht

Gib nid uf chline Clown [yeiyeah]
gib nid uf chline Clown [mmmmmh]
gib nid uf chline Clown [yeiyeah]
gib nid uf chline Clown [mmmmmh]

Vor luter Lache, – het däm aute Clown sis Härz ufghört schlah
und är dänkt nomau zrugg, – wis hät chönne si, – idr Zirkusmanege dstah
är het si Troum nid chönne läbe, – weuer Angst vorem Lache het gha
u we du widermau wosch ufgäh, — so dänk zrugg a dä Ma

Text & Musik: Simon Loosli, 2017

Wenn die Manne zämegriffe, – erhaltesi üsi Kultur,
mit dere Sportart wo no viu elter isch aus dr Rütlischwur.
Wenn si sich a de Hose näh,- chasch sicher si das öpis louft,
und wenn dr Sieger dr Muni nid wot, -ja den wirder eifach verchouft.

Denn äs si Schwinger usem Appizell
äs si Schwinger vo Luzärn
äs si Schwinger us dr ganze Schwiiz
doch di Beschte chöme vo Bärn

Und wenns ihm ufm Noteblettli füre Muni mau nid längt,
denn geiter zur Kranzdame füre und nimmtse eifach mit hei.
Deheime mueschere numme säge: Hey Froueli, ig ha di gärn,
du wirsch de gseh de geit de alles vo sälber und si seit:
di Beschte, di Beschte si chöme vo Bärn

Schwinger – usem Appizell
Schwinger vo Luzärn
Schwinger us dr ganze Schwiiz
doch di Beschte, di Beschte si chöme vo…

Text & Musik: Simon Loosli, 2008-2011

Ig hanes Meitschi
si heist Vreni
u ds Vreni isch so schön.
Si isch e flotti
mit grosse Ouge
doch gits da äs Problem:

Ds Vreni isch e Dame
wome sött besame –
si wet es Chaub vo mir.
Ig chase besinge
ig chase mälche
doch, ä Muni, das bini nid!

Vreni Vreni, dass wird nut mit üs –
du bisch viu ds schwär für mi
Vreni Vreni, nei da wird nüt drus –
wöu ig ke Muni bi

Ig ha mis Gäld gnoh
de bini gange
u hane Muni kouft für si.
Är isch e flotte
het e grosse Rügge
doch ds Vreni wot är nid.

Ig hase zämegfüert,
romantischi Musig gspiut
doch es klappet eifach nid.
Dä Muni steit uf Manne
mit grosse Tanne
und itz steit dä Cheib uf mi!

Muni Muni, dass wird nut mit üs –
du bisch viu ds schwär für mi
Muni Muni, nei da wird nüt drus –
wöu ig kes Trudi bi.

Egau zu wäm dass dis Härz ou geit
stüre chasches nid,
aber wichtig isch, dass mä geng d Wahrheit seit
so dass jede cha glücklech si.

Ou ds Vreni hets itz ändlech begriffe
dass ig ke Muni bi,
ou üse Muni, üse Muni…
dä steit itz nümm uf mi!

Text & Musik: Simon Loosli, 2018

I weis no guet wo du mir ds erschte Mau
es Müntschi ufds Mu hesch gäh,
i hamer numme dänkt es eifachs Meitschi
e sone Bibä, die muesch näh.

Aber gli heschmer zeigt, dases öpis git,
wo ig no nie ha gha:
äs Daheime u richtigi Gfüehl,
ja, bi dir füehli mi aus Ma [aus Ma].

Du bisch mis Lache,
ja du bisch mi Stärn,
ig ha dirs zwenig gseit,
aber ig ha di gärn.
Du bisch mi Ängu,
wo immer da isch für mi,
und aues das wo ig wetti si
für di [für di] für di [für di].

Das ig mängisch nid ganz eifach bi
das weis ig säuber o,
u wenni Seich gmacht ha, hesch mir e träne gäh –
hät nie Ärger übercho.

Aber dis Lache – das isch dr Lohn
für aus woni guet gmacht ha,
i ha dirs meh aus einisch zweni gseit –
wie gärn dass ig di ha [di ha].

Du hesch Angst, üsi Zit geit mau verbi –
wie lang mah d Ewigkeit wohl si?
Es isch e länge wäg, womer zäme dörfe gah
u i hoffe du weisch itz, – wie gärn das ig di ha!

Text & Musik: Simon Loosli

I ha gmeint, –
das mir geng die beschte Fründe chöi si
i ha gmeint, –
das Band wo üs verbingt das trenntme nid
i ha gmeint, –
bis as Änd vo dr Wäut chunnsch mit mir
bis zum Meer heimers gschaft, –
aber flüge chöimer nid

Weumer nie hei glernt flüge, –
isches itz eso
weumer nie würklich si dankbar gsi –
für aues das womer hei bercho
du loufsch hie die Wäg entlang, –
und du fragsch di wieso:
weumer beides numme Mönsche si
und kener Flügu hei übercho [hei übercho]

I ha gmeint, –
das du immer wirsch da si, – da si für mi
hesch dir doch gschwoore, –
dass la gheie dueschmi nid
ig weisno wini Angscht ha gha, –
wo dis Läbe i Gfahr isch gsi
bis mau ehrlich… –
hesch du z gliche gfüellt für mi?

Text & Musik: Simon Loosli, 2014

Äs isch für di nid eifach gsy,
nid eifach,- ou nid fir mi,
mir si zäme dür d Höll,
einisch hi und wider zrugg.

Mir hei beidi sehr viu Kollege gha,
wos drufa isch cho, isch fasch kene meh da
säg weischno,
weisch no wi das weh het ta?

Chum mit mir mit
mir göh zäme no einisch dür d Höll und wider zrugg
chum mit mir mit
nimm mini Hand u lase niemeh los.
Uf däm Hölle-Trip
wie Bonnie und Clyde kämpfe mir üs vorwärts Stück für Stück
chum mit mir mit
weu mir die beschte Fründä si –
numme du und i!

Ig weis no guet wie ig den gsecklet bi,
e Horde Tschugger und dr Tüfu hingerdri –
Lüge hei churzi Bei,
doch die länge – die ha ig [ätschibätsch]

U ufzmau hani nümm viu gha
si heimi plaget u mir z Läbe weue näh
aber du und ig,
mir hei geng zäme gha:

Mir hei zämä idr Höll ä chli Ferie gmacht
dr Tüfu hetnis glehrt was dr Himmu üs het bracht –
das mir beides
di beschte Fründä si!

Text & Musik: Simon Loosli, 2018

Si het längi blondi Haar, schöni blaui Ouge,
si isch geng z vorderscht bidr Predig derbi.
Am Abe duetsi bätte, für die Arme duetsi spände,
das cha numme e Ängu si.
Si schaffet imne Lade ganz brav vor adr Kasse, –
u de gseht si ihn
ihres Härz das isch am pumpe u Gedanke si am gumpe, –
si het sich verliebt i ihn

Är het churtzi schwarzi Haar, und e Läderjacke,
isch geng z vorderscht bi jedem Seich derbi,
är hautet nüt vom bätte, – u är isch nid grad e nätte, –
das cha numme e Tüfu si.
Är geit zu ihre im Lade, – het öpis weue chlaue –
und denn gseht är si
sis Härz das isch am pumpe u Gedanke si am gumpe, –
är het sich verliebt i si

Himmlisch höllischi Versuchig, –
u nur dr himmu luegt zue
wesech dr Tüfu miteme Ängu paart,
het d Mönschheit no lang ke rueh.
Himmlisch Höllischi Versuchig, –
im Bichtstuel isches passiert:
dr Tüfu het dr Ängu knallt, –
Himmu und Höll heisech ineang verliebt

Si hei zäme afa rede, d nummere tuscht und ebe, –
am gliche Abig trifft si ihn.
Si gö zame ga spaziere, dert bi dr aute Chile,
u de packt si ihn.
Si wots itz eifach wüsse, ihn berüere und wild küsse,
het nurno eis im Sinn…
Si zertne bis zum Bichtstuel und denn… –
vernascht si ihn.

Ir Chile isch aues klar, – aues ruhig wunderbar, –
si heis gwüsst: es dörfti nid si.
Si chöisech nümme ha, – lösech eifach so la gah, –
Himmu u Höll hei zuegluegt derbi.
Wiude Sex im Bichtstuel, – ke gummi derbi, –
u d Antibaby-Pille – die nimmtsi nid
u 9 Monet speter isch das Chind de fertig gsi…

Ja d Morau vo dere Gschicht, – wär gäng chli Regle bricht, –
isch z vorderscht im Läbe drbi,
weu gli drufabe scho, – säge beidi zunang ja, –
u si glücklech worde drbi…

Egau ob Morau oder nid, – eso hets müesse si,
dr Bichtstuel denn isch no nid aues gsy:
si zertne bis zum Autar u der vernascht si ihn,
si zertne bis zum Autar u der vernascht si ihn

Text & Musik: Simon Loosli

Säg wie mängisch, ha ig scho Ständli zeut,
we mi ds Schicksaal het ufe Rügge gleit
und glich, – hani nie los glah.

Eso wie denn, – i däm frömde Land
i dr gröschte Hitz, – irgendwo am Strand,
wo öpis, – i mim Chopf het la gah.

Säg wie mängisch, hesch du scho Angst gha um mi
eso fescht Angscht, – ig chöm nümm hei zu dir,
hesch mir mängisch gscheit – Papi – häb e chli Sorg zu dir
und ig verspriche Dir…

U geng wenn ig zum Himmu ufe luege,
de weisi ig ghöre no nid dert hi,
u geng wenn ig, i dini Ouge luege de wird mir klar,
ja de weisi werum, dass ig e Kämpfer bi…

Säg wie mängisch, hani denn tröimt vo dir,
dass du eines Tages Papi seisch zu mir,
ig ha lang uf di gwartet, aber ufgäh – hani di nid.

Eso wie denn, – a däm Wintertag,
dis Mami nimmt mi adr Hand u seit zu mir,
i 9 Monet isch si da.

Säg wie mängisch, wird ig no Angscht ha um di,
eso fescht Angscht, – du chömsch nümm hei zu mir,
ig wirdes mängisch säge – Sophia – häb e chli Sorg zu dir
und ig verspriche Dir…

U geng wenn ig zum Himmu ufe luege,
de weisi ig ghöre no nid dert hi,
u geng wenn ig, i dini Ouge luege de wird mir klar,
ja de weisi werum, dass ig e Kämpfer bi…

U wenni mau nümm witer weis, – de dänki fescht a di.
I luege i dini Ouge und ig erkenne wär ig bi,
und wenni kämpfe, – so kämpfeni für di,
weu ig di Vater, u dr Maa vo dim Mami bi…

Text & Musik: Simon Loosli, 2025

Du würdsch mi frage, wies mir geit
und wies um dini Tochter steit,
hey Mama – es geit üs guet.
Du würdsch mi frage: was hesch du so gmacht,
au die Jahr wie hesch si verbracht?
I ha kämpft und glitte bis ufs Bluet.

I würd dir verzöue wies denn isch gsi,
wie mir d Wält entdeckt hei, mini Schwoscht und ig,
und wie mir truuret hei um de.
I würd dir verzöue wie der Vater guet kochet het,
am Abe si mir nid z‘ spät is Bett,
aber s Gebät, es het gfählt vo dir:

«
I ghöre es Glöggli, das lüütet so nätt,
dr Tag isch vergange, jetzt gahni is Bett,
und im Bett dueni bätte, und schlafe de i,
dr Liebgott im Himmel, är wird wohl bi mir si
»

I würd di frage, wie’s dir geit,
wot wüsse wie’s um mini Mama steit,
du würdsch säge, es geit dir guet.
I würd di frage: was hesch du so gmacht,
au die Jahr wie hesch si verbracht,
hesch grännet wenn es Foti hesch agluegt?

Du würdsch mir verzöue wie’s denn isch gsi,
wie de üs vermisst hesch, mini Schwoscht und mi,
und fasch zerbroche wärsch derbi.
Du würdsch mi frage, a was das mir fählt,
es isch nid d’Liebi und es isch nid s‘ Geld,
i hät nume no ei Wunsch a de:

Chum nimm mi mit, mir göh zäme i das Land,
i das Land, wo üsi Wurzle si,
bis z oberscht ufe Eiffelturm oder ar Côte d’Azur a Strand
und mir vergässe für e Momänt
was emou isch gsi…

Mini Mama und ig

Text & Musik: Simon Loosli, 2014

Usm Räge, hesch mi inegnoh und du heschmer, –
dini Wermi gäh,
irgendwo zwüsche Giu und Ma da stah ig, –
und ig weis nid wie näh?
Mir hei sovil zäme glachet, mir hei üs gern gha, –
aber grännet heimer o,
du wüssisch nid was in 5 Jahr wärdi si, hesch du mir gseit
bevor du Tür hesch zueta und ig ha müesse gah.

Chumm und nimm mi mit,
nimm mi no einisch mit zu däm Stärn
wo üs denn, –
dr Wäg glüchtet het [ja dr Wäg glüchtet het.]
Und säg mir no einisch, du heschmi gärn,
und dases irgendwenn witer geit…
chumm und nimm mi mit zu däm Stärn

Du bisch mini grossi Liebi gsi, – ja und dini Liebi, –
die vergisseni nid,
Tränne i de Ouge das hani gha wo du vor mir steisch und mir seisch, –
dä Ring isch für di [für di, für di.]
Mini Wält si isch perfekt gsi für mi, – doch du heschs gwüsst, –
am Ziel bini no nid

Ig ha di ghasst, ig ha di verfluecht, –
und derbi nid überleit,
bis hüt hani dir nid merci gseit, für das alles wo du mir, –
i mi Rucksack hesch gleit

Chumm und nimm mi mit zu däm Stärn,
und säg mir no einisch, du heschmi gärn
und versprich mir du lasch mi niemeh los [du lasch mi niemeh los].
I üsere eigete Wält, wo numme dr Gedanke und d Erinnerig zehlt,
ja da wünsch i mir, nähmsch mi mit zu däm Stärn…

Chumm und nimm mi mit zu däm Stärn.

Text & Musik: Simon Loosli, 2009

Äs isch itz glich ou scho es Willi här, –
sit si es chlises Meitschi isch gsi
si het soviu erläbt und soviu müesse gseh, –
überau ligt verschlagnigs Gschirr
si het dr Gloube a sich verlore, wöu die Erwachsne, –
si hei scho früeh gsorget derfür,
uooo, – si hei scho früeh gsorget derfür…

Untreuii und Lügä, seue ihri Vorbilder si, –
ihres Läbe äs isch gwüss nid eifach für si
ihri erschti grossi Liebi söu d Erlössig bringe für si
doch ihri Hoffnig u ihri Liebi, – si stirbt mit ihm

[U är geit usm Hus]
si rüeft ihm no nache, bitte chumm niemeh hei
[är geit usm Hus]
e Träne louft ihm übers Gsicht
[är geit usm Hus]
aus wore blibt isch nur e chaute Stei, –
und es Härz wo geng zerbricht
uooo, – und es Härz wo geng zerbricht…

Ihres Härz, – äs söu für immer verschlosse si,
u richtigi Fründe wore häufe, – das het si nid
kene seit stopp u kene hets gmerkt, –
was mit däm Meitschi nid stimmt,
es ändloses Puzzli ohni Biud und ohni Sinn,
wo niemaus zäme fingt
uooo, – wo niemaus zäme fingt

Nach Jahre äntlich, da chunnt dä Mönsch wo ihres Härz befreit,
aber si isch tribe vo dr Angscht, dases öper wider – verheit…
ihri neui grossi Liebi seu d Erlössig bringe für si,
doch ihri Hoffnig und ihri Liebi, – si geit mit ihm

[U är geit usm Hus]
si rüeft ihm no nache, bitte chumm niemeh hei
[är geit usm Hus]
e Träne louft ihm übers Gsicht
[är geit usm Hus]
aus wore blibt isch nur e chaute Stei, –
und es Härz wo geng zerbricht
uooo, – und es Härz wo geng zerbricht…

Text & Musik: Simon Loosli, 2015

Ä Tätowierig ufm Arm und d Haar die chöme bis zum Arsch,
und i Thank, – da füllemer numme Bleifrei i,
de hockemer ufe Bock und de gäbemer richtig Gas,
grad eso, – u nid angers muesses si…

Hesch du nid ou scho mau wöue, – wöue e Rocker sii, Baby?
mit Benzin und Rock’n’Roll im Bluet bisch drbi..

De heizä mir mit 100ert Sache näb dr Schmier verbi,
ganz beruhigt, – wöu verwütsche düesi üs ja sowieso nid,
mir hei ke Angst um üse Führerschin, – wöu e Rocker dä brucht das nid,
üsi Maschine, si louft nid mit Papier, – si brucht lediglich Benzin…

Hesch du nid ou scho mau wöue, – wöue e Rocker sii, Baby?
mit Benzin und Rock’n’Roll im Bluet bisch drbi..

Und eines Tages ja da isches ou fürne Rocker sowit,
sini Maschine, si rüeftne, äs geit uf zum letschte Ritt.
Sini Kollege, si begrabenä denn am Strasserand
u aus Urne, ja da dient si tüür Harley Thank…

Hesch du nid ou scho mau wöue, – wöue e Rocker sii, Baby?
mit Benzin und Rock’n’Roll im Bluet bisch drbi..

Text & Musik: Simon Loosli, 2006+2026

Mir hockä uf däm Bänkli,
und är verzeut mir sini Gschicht.
Winer z Grossi het lere kennä, –
lang vo mire Zit.

Är verzeut mir au die Gschichte,
wis früecher emau isch gsy,
wo d Lüt no Angst vorem Tüfu hei gha,
u d Liebi no öpis wärt isch gsy.

Die graue Haar,
und au die Falte i sim Gsicht,
si Züge vore lang vergangene Zit,
u verzeue üs die Gschicht.

Är chlopfet mir uf d Schultere,
und de seit är lisli zu mir:
Für euch Junge hei mir Autä aues gäh,
drum passet uf, dases nid zerbricht!

Üsi Autä si gäbä no
und mir dörfes eifach näh,
si heinis nüt verlangt – aber e chli Respäkt –
äs wär es eifachs Gäh und Näh.

Üsi Autä, si läbe no
u müesse gseh wimers z Bodä löh,
ihres Bluet, ihre Schweiss, bises nümm witer geit,
u ke Stei meh ufm andere steit…

Üsi Autä si gäbe no…

Üsi Autä si stur seitmä
u si redä üs gärn dri,
doch we du z Läbe lang für öpis gwärchet hesch
würdsch du nid angers si.

I ghöre die aute Gschichte
u de fautsmer wider i,
das Aues das womer hei, irgendwo här chunnt
und nid säubschtverständlech darf si.

Mi Äti u mis Grossi,
si heisech furchtbar lieb,
es läbelang si die beide zäme gsy,
so öpis findsch hüt nid.

Är chlopfet mir uf d Schultere
und de seit är lisli zu mir:
Eines tages luegsch zrugg uf das wo gleistet hesch
drum gib dir Müeh das du stouz chasch si!

Üsi Autä si gäbä no
und mir dörfes eifach näh,
si heinis nüt verlangt – aber e chli Respäkt –
äs wär es eifachs Gäh und Näh.

Üsi Aută, si läbe no
u müesse gseh wimers z Bodä löh,
ihres Bluet, ihre Schweiss, bises nümm witer geit,
u ke Stei meh ufm andere steit…

Mir hockä uf däm Bänkli,
und är verzeut mir sini Gschicht…

Text & Musik: Simon Loosli, 2019

Sie isch es hübsches bündner Meitschi gsi,
us derä Stadt, – woni gross wordä bi,
viva la Grischa, – i vergisse si nid.

Amene schöne Herbsttag, wo si und ig,
i derä Bündnerstadt ungerwägs si gsy,
si het e Chätschgummi gha und ufzmau, – da hane ig…

I hät niemaus dänkt, – zu was dases füehrt,
si het miner Lippe, – und mis Härz berüehrt,
viva la Grischa, – i vergisse si nid.
Viva la Grischa – ghörsch du mi?
Viva la Grischa – i wet bi dir si,
i derä Bündnerstadt [uooho] woni daheime bi gsy.

Viva la Grischa – überall woni bi,
viva la Grischa – dänki nur a di,
a die schöni Zit – woni ha gha – ha gha mit dir.

Si het die schönschtä Bärge, woni je ha gseh
und ihri Ouge – ou jemineh!
und ihri Bei, die si so schön wines Steibockgwei…

Irgendeinisch isch dr Tag de cho,
woni ha müesse packe, u i ha müesse gah,
mini Tränne si gloffä, woni di z letschmau gseh ha.

Viva la Grischa – ghörsch du mi?
Viva la Grischa – i wet bi dir si,
i derä Bündnerstadt [uooho] woni daheime bi gsy.
Viva la Grischa – überall woni bi,
viva la Grischa – dänki nur a di,
a die schöni Zit – woni ha gha – ha gha mit dir.

Fasch jedi Nacht, tröimä ig vo dir,
fasch eso, – aus wärsch du no bi mir,
i tröimä vo dä schönä Bärge, – vo de Steiböck und vom Rhy
und de wünschi mir, i chönnt wider z Chur daheim si

Text & Musik: Simon Loosli, 2018

Wenn am Morge am 5i dr Wecker geit
no befor am Büru si Güggu chräit,
de starte si d Motore – es muess itz öpis gah

Si göh ab i Bude, dr Brummi ga lade
mit 80 Sache, dr Sunne entgäge
dr Disu isch am sugge u dr Asphalt laht gli nah…

Si si einsam uf dr Strass aber glich nie elei
scho überau gsi aber glich niene dihei
Asphaltcowboys und mir säge Hey Hey Hey

40 Tonne – puri Liebi
40 Tonne – Energie
40 Tonne – ungerwägs für di und mi
Es si 40 Tonne puri Liebi
40 Tonne Energie
Swisstruckers ungerwägs für di und mi

Mit üsne Chauffeure si ou die vor Schmier ungerwägs
Übergwicht wird bestraft und no viu meh Gsetz
gfange i der Freiheit rite si dür üsi Prärie

U stöh si wider mou imene grosse Stou
duet dr Dispo am Telefon wiene Sou
als giengs um Läbe und Tod – abglade mues pünktlich si

Ou dr Rolä är het mir eismou verzöut
är heig die Auti diheime vor Türe gstöut
Sini neui isch schwerer – 40 Tonne Liebi für ehn ehn ehn…

40 Tonne – puri Liebi
40 Tonne – Energie
40 Tonne – ungerwägs für di und mi
Es si 40 Tonne puri Liebi
40 Tonne Energie
Swisstruckers ungerwägs für di und mi

Text & Musik: Simon Loosli